1 Corinthians 12

Anyaga Zafun Nya

1Nsaiye, omazaje, mi cei pma ma daɓo to na nyaga Zafun Gyigyi-yi nya ɓo. Mito cei pma lo fya fi nko wyegma m. 2Fye kpelo ge, esa fye ɓei ye zhin a shetan-da nyi, fye ɓei zhin fyei vi ashan nu n ɓa ta kpe ɓedan, ɓai wu fye zokwo nukwoi. 3Ama fye sun lo n na zai n ɓa yi ɓahin lo ge Shekwoyi Zafun nu wu ɓa ɓo nɓa da nyi. Fye ɓa kpe wuna ge ɓa zhin a Shekwoyi nya nu ko aza kata? Fye ɓa kpe ɓaye lainu. Zaho-zahoi n Shekwoyi Zafun kun-sun lo woi, wota mi wa cige, “Yesu zhin knitu yi nun.” Zahoi ta mi wa cige, “Yesu zhin Dagayi nu,” har koi kufi nwomi lonun, akpe ge Zafun Gyi-gyi-yi kunsun woi.

4Anyaga lo gbo-gbo, ama Zafun gmanyi nu gaɓa. 5Azokwo lo gbo-gbo, n na zhin bauta ama Dagayi gmanyi nu n na zhin Wo bauta. 6Atnu-tnu lo gbo-gbo, ama Shekwoyi gmanyi nu lo tnu-tnu n naza mi vinya. 7Zafun Gyi-gyi-yi zhin Wa wu Shekwoyi iko n zaho-zahoi mi ntu naza vinya a pma ɓo.

8Zafun ga zaho ɓeda wyemwa nya (genyikpe), zaho kwa wa bwa nyaga ɓeyekpe, nya nu, du Zafun gmanyi nu ga ɓa. 9Zafun gmanyi nu ga zaho gaiciya-ga zaho gaiciya-ga zaho kwa wa gawo iko wa ka anyasan gna. 10Zafun ga zaho iko wa zhin aɓo wowoyi, zaho kwa wa bwa waʼazi zhin gba. Zaho wa bwa iko wa kpe ko a zafun nukwoi nu daɓo n naza gbe n ɓa yi ɓahin ge ɓa da Shekwoyi ɓeda nyi, ko kwa zafun Shekwoyi nya nu ku ɓeda n ɓa gbe. Zado jesun wa bwa iko ɓeda nya dna na nyitala gbo-gbo nʼwo to shin ɓa mwitu m zado kasun wa bwa iko anyitala bmapmi nya. 11Ama Zafun Gyi-gyi-yi gmanyi nu zhin aɓoye vinya, Woi gna anyaga ye n naza ba shi Wo wyewyeyi cei pma.

12Eyi anayi na gai lo mwa begye, ama n na ye agayi ɓedo vinya, ɓa zhin nayi gmanyi nu. Kristi wulo lonu nu. 13Zaho-zahoi nʼyi mi wo zhin oga nu dna Kristi nayi. Azaho nʼyi mi a Yahudiyi nu, a zaho a Helleniyi, azaho zhin afyenu nu, a zaho kwa a loloiya nu. Ama Zafun Gyi-gyi-yi kuyi zhin batisma fi n Kristi nayi gmanyi, ai la Zafun Gyi-gyi-yi ho gayi n naba gmanyi.

14E, ntuge nayi to bwasun nʼgai gmanyi nun, ama n na gai mwa begye. 15N pita cige, “Shi konyi mi to zhin obwa nun, mi to dna lo n nayi mi m,” deye ta du kwa gmi koya n naga nayi nya m. 16Ntnubua cige, “Mito zhin ewye num, mi bwa tnubua nu zhin, ntu cenu mi to dna lo n nayi mim.” Ashe deye ɓa zhin kwa gmiya n na ʼga nayi nya? 17Ashe nayi vinya ɓo zhin ewye nu, atnubua ɓowo lo numa? Kwoi ɓo zhin tnubua yako ho nu vinya, a wo a bua-sin wuna?

18Ama shi ko nyi, Shekwoyi ɓei fi a ga doho-dohoi n ɓa aba shi wo ye cei. 19Ogye nayi wuwuna nu, Kwoi ɓei ngai bwasun lo gmanyi nu a? 20To, ama wo ku aga zhin mwa begye, ama nayi gmanyi nu.

21Ewye ta ci obwa ge, “Mi to ha pmai lom,” Tukwo ta ci apita ge, “Mi to fya pmai lom.”

22Ɓehin-hin, aga nʼyi ci ɓa wyegba ntu ɓa kala gbaɓo, ɓa gna sun napmai mwa. 23Ado yi gye ge ɓa to zhin nyaho nu m, oɓanu n yi wan kna du, ado kwa nɓa zhin a vinyikwo nya, ya ku ɓa so naza wyeba, 24atna vinyikwo nya kwo n ɓa wu bmi pei-pei, yi to damu n ɓa knawan ɓeyim. Ama Shekwoyi la nayi ye ɓedo n ʼgbai n nabai ge aga n ɓa to kunce lo ɓa bwa aknawan daidai. 25Kwo nu ɓe n bwa doloyi n naga nayi nya, ɓai wanje akna shi ega doho-dohoi wan kohin akna nyi. 26N nyasan san oga gmanyi, aga je vinya ɓa gye azhin n gnisun kwoi. N ʼga gmanyi a bwa latu, aje ɓa ce nyi, ɓa dagma n kunsun kwoi.

27Ofye vinya fye zhin Kristi nayi nu, zaho-zahoi zhin oga nu nko mi. 28Dna ikklisiya kwa, Shekwoyi ku aza zhin fi nko mi, kmisunyi a Nabari tnutnu loyi, bayi a anabi-a waʼazi zhinyi, tahi n nyawuyi; sai ɓewowo zhin-yi, aza kagnayi, aza bmazhin-yi; aza n ɓa ɓa mi ɓa gyabye nazai ɓa zhin tnutnu nʼgbei lodo, n nazai n ɓa da anyitala gbo-gbo. 29Zaho-zahoi zhin Nabari tnu-tnu loyi nu? Nge awo. Zahozahoi zhin waʼazi zhin-yi nu? Awo. A zhin anyawuyi nu vinya? Zaho-zahoi n ikoi lo wa zhin aɓo wowoyi? 30Ko wa ka anyasan gna? Ko wa da abye gbo-gbo to woi tuɓa mwi n? Ko zaho-zahoi nu ɓa mi wa wo ʼza woi daɓo dna nyitala-woyi, har wa go ko gna ʼza to woi shin ko won?

Oɓo Nko Du Vinya Nanyi

31Awo, ama fye yi fyehin fya zan nyaga Zafun nya duduyi nu shin. Ama dei, miɓa wu fye zokwo nko gnaɓa bmiya lo vinya!